ភ្នំពេញ៖ កម្ពុជា-អាមេរិក បានប្តេជ្ញារួមគ្នាបង្រ្កាបបទល្មើសគ្រឿងញៀន និងតាមចាប់ខ្លួនឧក្រិដ្ឋជនជួញដូរគ្រឿងញៀនឱ្យដល់ឬសគល់ដើម្បីយកមកផ្តន្ទាទោសតាមច្បាប់។

មន្ត្រីប៉ូលីស DEA របស់សហរដ្ឋអាមេរិកប្រចាំការនៅកម្ពុជាចំនួន២រូប គឺលោក Kenny Lee និងលោក Chao Sabath បានបង្ហាញការប្តេជ្ញាចិត្តចំពោះការបង្រ្កាបបទល្មើសគ្រឿងញៀនជាមួយកម្ពុជាក្នុងអំឡុងជួបសំណេះសំណាលការងារជាមួយនាយកមន្ទីរប្រឆាំងបទល្មើសគ្រឿងញៀន លោក ឧត្តមសេនីយ៍ទោ ឃឹង សារ៉ាត់ នាថ្ងៃទី១៣ ខែធ្នូ ឆ្នាំ២០២២។ 

លោក Kenny Lee បានកោតសរសើរដល់ ការឡើងកាន់ដំណែងថ្មីរបស់នាយកមន្ទីរប្រឆាំងបទល្មើសគ្រឿងញៀន និងមន្ត្រីអនុវត្តច្បាប់ប្រយុទ្ធប្រឆាំងគ្រឿងញៀនកម្ពុជា កន្លងមកដែលបានចូលរួមសហការ និងចែករំលែកបទពិសោធន៍។ 

មន្ត្រីប៉ូលីស DEA របស់សហរដ្ឋអាមេរិកប្រចាំការនៅកម្ពុជា លោក Kenny Lee សង្ឃឹមយ៉ាងមុតមាំថាកិច្ចសហការនេះនិងនៅតែបន្តជានិរន្ត៍តទៅ ដើម្បីសំដៅរួមគ្នាបង្ក្រាបបទល្មើសគ្រឿងញៀន និងចាប់ខ្លួន ឧក្រឹដ្ឋជនគ្រឿងញៀនមកផ្តន្ទាទោសឱ្យបានដល់ឬសគល់។

ការពង្រឹងកិច្ចសហប្រតិបត្តិការលើការបង្រ្កាបបទល្មើសគ្រឿងញៀនរវាងប្រទេសទាំងពីរនេះ ស្របពេលដែលអាជ្ញាធរកម្ពុជាកំពុងតែស្រាវជ្រាវ និងតាមចាប់មេខ្លោងជួញដូរគ្រឿងញៀនជិត៩០០គីឡូក្រាមនៅខេត្តព្រះសីហនុ និងបទល្មើសផ្សេងៗទៀតផងដែរ៕